இந்தியாவின் கிரக நிலை அப்படி!

இந்தியாவின் கிரக நிலை அப்படி! இனிவரும் காலங்களில் சீனாவும் இந்தியாவும் முதலிரு நாடுகளாக மாறிவிட இன்றைய முதல் நிலை நாடான அமெரிக்கா மூன்றாம் இடத்துக்குப் பின்னடைந்து போகவுள்ளதாக வேறுபட்ட ஆய்வறிக்கைகள் கணிப்பீடுகளை வெளிப்படுத்துகின்றன. அதனை ஏற்கனவே இயங்கி வந்த பொருளியல் செல்நெறி தீர்மானித்திருந்தது; கொரோனா வீச்சு துரிதப்படுத்தி உள்ளது. சீனாவும் இந்தியாவும் ஏகாதிபத்திய நாடுகளது சுரண்டலுக்கு ஆட்பட்டிருந்து கடுமையான போராட்டங்கள் வாயிலாக விடுதலை பெற்ற நாடுகள் தாம். இரண்டும் மீட்சிபெற்று உயர்வடைவது வரவேற்கத்தக்கது தான். சோசலிசத்தை முன்னெடுத்த சீனா எண்பதாம் ஆண்டுகளில் இருந்து முதலாளித்துவத்தையும் அரவணைத்தபடி ‘சந்தை சோசலிசம்’ என்ற நடைமுறையை இன்று பின்பற்றி வருகிறது; உலக மயமாதலை வாய்ப்பாக்கிக்கொண்டு புதிய பட்டுப்பாதைத் திட்டத்தின் வாயிலாக துரித கதி முன்னேற்றத்தைப் பெற்று வருகிறது. சீனா உலக மயத்தை ஏற்ற பின்னர் மிகுந்த தயக்கத்தோடு அதன் வழி தொடர்ந்த இந்தியா முன்னதாக பூரண முதலாளித்துவத்தை அன்றி சோசலிசக் கூறுகளையும் உள்ளடக்கிய கலப்புப் பொருளாதாரத்தையே பின்பற்றி வந்திருந்தது. அப்படி இருக்க சீனா மக்கள் நல நாட்டத்தோடு சோசலிசத்தைக் கட்டமைக்க முற்படுவதாகவும் இந்தியா ஏகாதிபத்திய - மேலாதிக்க வாத அணியின் தலைமைப் பொறுப்பை ஏற்கவுள்ளதாகவும் கூறுவது என்ன வகை நியாயம்? மற்றொரு வேடிக்கை, கோடிக் கணக்கான வறியவர்களைக் கொண்டுள்ள பரம ஏழை நாடான இந்தியா இரண்டாவது பெரிய வல்லரசாக ஆகிவிடுமா - அதெப்பிடி? அதுதாங்க இந்தியாவுக்கான இன்றைய கிரக நிலை! இந்தக் கிரக சஞ்சாரம் இன்று நேற்று ஏற்பட்டதல்ல. இரண்டு நூற்றாண்டுக்கு மேற்பட்ட சங்கதி. சீனா துண்டாடப்பட்ட பல்வேறு ஏகாதிபத்திய நாடுகளால் சுரண்டப்பட்டது. எந்தவொரு நாட்டின் நேரடி நிர்வாகத்தில் ஒருமுகப்படுத்தி ஆள இயலவில்லை. மாறாக இந்தியா பிரித்தானிய ஏகாதிபத்தியத்தினால் நீண்டகாலம் நிர்வகிக்கப்பட்டு வந்தது. இந்தியாவில் முதலாளித்துவம் வளர்ந்த அளவில் சீனாவில் இல்லை. தொழிலாளரது போராட்டங்களுக்கு முற்படுவதற்கான தேவையை விடவும் விவசாயிகளை அணிதிரட்டி ஒன்றுபடுத்திய தேசிய விடுதலையை வென்றெடுக்க மார்க்சியம் வழிகாட்ட இடமளித்தமையால் அதற்குரிய வளர்ச்சி பெற்ற கோட்பாட்டு நிலைகளோடு போராடிச் சீனா விடுதலையை ஈட்டத்தடை இருக்கவில்லை. இந்தியாவில் ஒப்பீட்டு ரீதியில் வலுவாக இருந்த தொழிலாளர் அணிக்கான போராட்டங்கள் முன்னெடுக்கப்பட வேண்டி இருந்தமையால் இந்தியச் சமூக நியதிக்கான மார்க்சியப் பிரயோக வளர்ச்சிகளில் நாட்டம் காட்ட இயலவில்லை. சீனத் தேசிய விடுதலைப் போராட்டம் மார்க்சிய வழிகாட்டலுடன் முன்னெடுக்கப்பட்டமையால், முன்னர் இருந்த மேலான வாழ் நிலை பற்றி அதிகம் பிரஸ்தாபிக்காமல் விவசாயிகளது வாழ்வியல் விருத்திக்கு கட்டியெழுப்பப்பட வேண்டியுள்ள எதிர்கால அமைப்பாக்கம் பற்றிய அக்கறையே மேலோங்கியதாக இருந்தது. இந்தியாவின் தேசிய விடுதலைப்போராட்டம் முதலாளி வர்க்த்தால் தலைமை தாங்கப்பட்டது அதன் சுரண்டல் நலன் சார்ந்து நிலப்பிரபுத்துவத்துடன் கூட்டமைத்துப் பிற்போக்கு வாத நிலைப்பாட்டையும் இணைவாக்கிக் கொண்டது. பழம் பெருமைகளை முன்னிறுத்திய இந்துத் தேசியவாதம் தலைமை பெற்று வேதகால மீட்டெடுப்புகளும் சாதிவாத நிதர்சனங்களும் மேலோங்கி இருந்தன. அதேவேளை, கனகச்சிதமான பிரித்தானிய ஆட்சிமுறை இந்திய வாழ் நிலையைக் கற்றுக்கொண்டு அதன் சாதிபேத இயங்காற்றல் படி பிரித்தாளும் தந்திரோபாயத்தை வரித்துக் கொண்டது. இந்திய சுதந்திரப்போராட்டம் தொழிலாளர் அணியின் கைவசப்படாமல் இருக்க ஏற்றதாக காங்கிரசுடனான ஊடாட்டத்தைக் கையாண்டு அக்கட்சியிடம் ஆட்சி மாற்றத்தைக் கையளித்துச் சென்றது பிரித்தானிய ஏகாதிபத்தியம். என்னதான் கெட்டித்தனமாக காங்கிரஸ் சோசலிச/ஏகாதிபத்திய நாடுகளில் எந்த ஒன்றோடும் ஒட்டிக் கொள்ளாமல் இரு அம்சங்களையும் இணைக்க முயன்றாலும் நீண்ட காலத்தில் இந்தியா ஏகாதிபத்திய நாடாகும் என்ற கணிப்புடன் இயங்கிய மேலாதிக்க சக்திகள் இன்றைய இந்துத்துவ மேலோங்கலுடன் அக்கனவு மெய்ப்படக் காண்கின்றனர். வரலாற்று செல்நெறி விதி பிரித்தானியாவின் முதல் நிலையையைப் பறித்து அமெரிக்காவிடம் கையளித்ததைப் போல அமெரிக்கப் பொருளாதாரம் பின்னடைவைச் சந்திக்கும் என்பதை சுரண்டல் கும்பலின் சிந்தனையாளர் தரப்பு அறியாமல் இல்லை. தனது சோசலிச முறையைத் தக்க வைக்கச் சந்தைச் சோசலிசத்தை இணைக்கும் சீனப் பாணி அதனை முதல் நிலைக்கு இட்டுச் செல்லும் போது, அது பின்னர் முழு நிறைவான சோசலிச மாற்றியமைத்தல்களுக்கு முன்னுரிமை கொடுக்கும். ஏனைய நாடுகளும் சோசலிச நாட்டத்தை மேற்கொள்வர். சீனாவுக்குப் போட்டியாக அதன் அயல் நாடுகளான யப்பான், தென்கொரியா, சிங்கப்பூர், தைவான், தாய்லாந்து ஆகியவற்றை மேலாதிக்க வல்லரசுகள் வளர்த்ததைப் போல எதிர்காலசோசலிச அச்சுறுத்தலைத் தவிர்க்க வேண்டி இந்தியாவுக்கு வாய்ப்பு ஏற்படுத்திக் கொடுக்க வேண்டிய நிர்ப்பந்தம் இன்றைய ஏகாதபத்திய அணிக்கு. இந்தியாவின் சாதியமைப்பு பணக்கார நாடாக முன்னேற இடமளிக்காது என்ற வாய்ப்பாடு பலரிடம் உண்டு. ஐநூறு ஆண்டுகளின் முன்னர் முதலிரு நாடுகளாக ஏற்கனவே இந்தியாவும் சீனாவும் இருந்தபோதும் இந்தியா சாதியமைப்பு உடையதுதான். ஏகாதிபத்திய ஆட்சி முறைக்கு ஐரோப்பா முன்னர் கண்டனுபவித்து வந்த வர்க்க அரசியலை விடவும் இந்தியாவின் சாதிமுறை சார்ந்த முழுச் சமூக சக்தியின் இயக்க முறை அதிக பயனுடையது என்பதை அவர்கள் கண்டு, அதனைக் கற்றறிந்து பிரயோகித்து இருந்துள்ளனர். ஏற்கனவே இலங்கையை ஆக்கிரமித்து மேலாதிக்கவாத அரசியலை எவ்வளவு கனகச்சிதமாக இந்தியா கையாள்கிறது? இலங்கையில் உள்ளவர்களுக்கும் தாம் ஆக்கிரமிக்கப்பட்டுள்ளோம் என்று தெரியவிடாமல், இந்திய மக்களுக்கும் தமது ஏழ்மை நிலை பற்றியன்றி வேறு சிந்தனை கொள்ள இடமில்லாத மேலாதிக்க நாட்டுப் பிரசைகள் நாம் என்ற கர்வம் கொள்ளத் தேவையில்லாத ஒரு அரசியல் முறையை எத்தனை சிறப்புடன் இந்தியா முன்னெடுக்க முடிகிறது? இது திணை அரசியல் செயல் ஒழுங்கு. தமிழர் வரலாற்றில் சிறப்போடு இயங்கி வந்தது. தமிழர் சமூகமும் இதுபற்றிக் கண்டுகாட்ட முன்வராத போது ஏனையவர்கள் எப்படி அறிந்திருக்க இயலும்? வர்க்க அரசியல் போக்குக்கு மாறான திணை அரசியல் இயக்க மாதிரி பற்றியும் பேசும் பொழுதுதான் வரலாற்றுப் பொருள் முதல் வாத - இயங்கியல் பற்றிய முழுமையான புரிதலை எட்ட இயலும்! தொடர்ந்து உரையாடுவோம்!