மாஓ சேதுங் தேர்ந்தெடுக்கப்பட்ட படைப்புகள் 9 பாகங்கள்

மாவோ: தேர்ந்தெடுக்கப்பட்ட படைப்புகள் 9 பாகங்கள் . மாவோ: தேர்ந்தெடுக்கப்பட்ட படைப்புகள் ஒன்பது தொகுதிகளாக வெளிவந்துள்ளன. இதற்கான முயற்சியில் விடியல் சிவாவின் பங்கு குறித்து எற்கனவே சொல்லி இருந்தேன்.. அதன் வெளியீட்டுக்கு ஓரிரு மாதங்களின் முன்னர் அவரது மறைவு ஏற்பட்டிருந்தது. இருப்பினும், அத்தகைய முயற்சியின் வெற்றி குறித்த மகிழ்வோடுதான் கண்களை நிரந்தரமாக மூடிக்கொண்டார். இந்த வெளியீட்டில் முதல் நாலு விடியல் ஊடாகவும், ஏனைய ஐந்தும் அலைகள் வாயிலாயும் வெளியாகின. இவற்றை எனக்கு உடனடியாகவே பெற்று அனுப்பியவர் நண்பர் நவநீதன்; முதல் இரு தொகுதிகள் வழக்கமான கலைச்சொல்லாக்கத்திலிருந்து வேறுபட்டு அமைவதாகக் கூறி, அதுகுறித்து எனது அபிப்பிராயத்தைக் கேட்டிருந்தார். முதல் நாலு தொகுதிகளில் உள்ளவை அனேகமாய் பலதடவை படிக்கப்பட்டவை. ஐந்தாம் தொகுதி மாஒவின் இறுதிக்காலத்தில் சீனாவில் தொகுக்கப்பட்டு ஆங்கில மொழியாக்கம் வெளிவந்தது. ஏனையவை நடைமுறை அவசியத்தொடு வெளியிடப்பட வேண்டும் என்ற கருத்து மாஒவிடம் இருந்ததாக அறிந்திருக்கிறேன். பிந்திய தொகுப்புகளைப் பார்த்தபோது மாஒ மறைவின் பின்னர் சீனப்பாதையை நிராகரித்தவர்களால் ஆதாரபூர்வ சீன வெளியீடுகளில் இருந்து பெறப்பட்டுத் தொகுக்கப்பட்டமையைக் காண முடிந்தது. இந்த மாற்றநிலை மிகுந்த கவனிப்புக்குரியது. மாஒவின் இறுதிக்காலத்தில் மூன்றுலகப் பகுப்பாக்கம் பேசுபொருளாயிருந்ததை அன்றைய "பீக்கிங்க் ரிவியூ" சஞ்சிகையில் பார்த்த நினைவுண்டு. பின்னர் மாஒவின் மறைவைத் தொடர்ந்து மூன்றுலகக் கோட்பாடு பிரதான விவாதப்பொருளாகி, மீண்டும் இன்னொரு தடவை உலகப் பொதுவுடமை இயக்கம் பிளவடைந்தது. இதன் பேறாக இத்தொகுதி மூன்றுலகப் பகுப்பாக்கம் தொடர்பில் மாஒவின் நிலைப்பாட்டை எவ்வாறு காட்டுகிறது என்பதை அறியும் ஆர்வம் உந்திய நிலையில் ஒன்பதாவது தொகுதியை முதலில் படித்து முடித்தேன். வழக்கமாக முதலில் இருந்தே படித்துச் செல்லும் என் மரபுக்கு மாற்றாக, மேலிருந்து கீழாகப் படித்துச் செல்ல முடிவெடுத்தேன். மூன்றுலகக் கோட்பாட்டை நிராகரித்த பிரிவினரின் தொகுப்பு முயற்சி என்கிறவகையில் வலிந்து அதற்கு ஆதரவாக எதையும் சொல்லியிருப்பார் என்று காட்ட எத்தனம் இருக்கும் எனும் ஐயத்துக்கு இடமில்லை. இப்படிச் சொல்வதால் மூன்றுலகக் கோட்பாட்டை ஏற்று மாஒ சொன்னதாக ஆதாரம் இருந்ததாகப் பொருள் இல்லை. இது ஆழமான தத்துவார்த்த-நடைமுறை விவாதப் பொருள் என்பதில் சந்தேகத்துக்கு இடமில்லை. அதேவேளை மூன்றுலகப் பகுப்பை அவர் கவனம்கொண்டு அதுதொடர்பில் தனது கருத்தை வெளிப்படுத்தியமை ஒன்பதாம் தொகுதியில் பட்டவர்த்தனமாக வெளிப்பட்டிருக்கக் காணலாம். அது தொடர்பில் அடுத்த பதிவில். எட்டாவது தொகுதியில் சோவியத் யூனியனோடான தத்துவார்த்த, நடைமுறை முரண் கூர்மைப்படத் தொடங்கியபோதிலும், வெளிப்படையாக எதிர்நிலை எடுக்காது, அவதானமாகக் கையாளும் முயற்சியாக அவர் தன் கருத்தை வெளிப்படுத்தும் நுட்பம் தெரிகிறது. ஸ்டாலின் சோசலிச மாற்றியமைத்தலில் இழைத்த தவறுகளை சுட்டிக்காட்டி, அதிலிருந்து கற்றுக்கொண்டு, சீனா எத்தகைய நடைமுறையைக் கையாள வேண்டும் என்பதைக்கூறியிருந்தமை கவனிப்புக்குரியது. ஒன்பதாம் தொகுதியில், குருஷேவ் ஸ்டாலின்மீது அபாண்டமான குற்றவிமர்சனங்களை வெளிப்படுத்திய நிலையில், மாஒ ஸ்டாலின் தொடர்பாக சமநிலையான விமர்சனத்தையும், சோவியத் யூனியன் மீது வெளிப்படையான கண்டன விமர்சனங்களை முன்வைப்பதையும் காண இயலும். அரை நூற்றாண்டைக் கடந்து, தொடர்மாற்றங்கள் பலவற்றைக் கண்டுள்ள இன்றைய அனுபவங்களோடு அன்றைய போக்கு அமைந்தவாறை அவ்வப்போதைய அனுபவப் பதிவுகளாக இத்தொகுதிகளில் காண முடிந்துள்ளமை பெரும் வாய்ப்பு. ஏனைய தொகுதிகளைப் படித்துச் செல்லும் நகர்வில் இவை தொடர்பாக உரையாடுவோம். இன்று எமது தேடல் வலுப்பட்டுவருகிற சூழலில் மாஒவைக் கற்றல் மிகுந்த அவசியமுடையது. புத்தகங்களில் இருந்து பத்துவீதமும், நடைமுறை வாயிலாகவே மிகுதித் தொண்ணூறு வீதமுமான மார்க்சியத்தைக் கற்றேன் என்கிற மாஒவை கற்று, எமக்கான தொண்ணூறு வீத நடைமுறைக்கான மார்க்கத்தைக் காண ஏற்ற கருத்தியலைப் பெற இந்தக்கற்றல் உதவும். இன்று நண்பர்களிடையே எதிரியைக் கையாள்வது போன்ற மோதல் வலுத்துவருவது, கருத்தியல் தெளிவீனத்தின் வெளிப்பாடாகும். அதன்பொருட்டு இக்கற்றல் தொடரப்படும். மாஓ சேதுங்கைக் கற்றல் என்பது திணை அரசியலின் அடித்தளத்தைப் புரிதல் எனவாகும்!

வர்க்க வாத முடக்கங்களைத் தகர்த்துச் சோசலிச முன்னெடுப்பானது வர்க்கச் சமூக முறைமையால் இயலாமலாகி விடுதலைத் தேசிய (திணை) - முழுச் சமூக சக்திக்கான - அரசியல் முன்னெடுப்பு முறைமை வாயிலாகவே சாத்தியமாகி இருப்பதனை மாஓவிடமிருந்தே அதிகம் புரிதல் கொள்ள இயலும் இப்போது இந்த நூல்களை கே.ஏ.எஸ். சத்தியமனை நூலகத்தில் பெற்றுப் படிக்க இயலும். எமது பாரம்பரியத்தில் இயங்கியல்-பொருள்முதல்வாதச் சிந்தனை முறைமை எதுவுமே இருந்ததில்லை என்ற விஞ்ஞானக் கேடான ‘மார்க்சியத்தை’ நடிப்புப் ‘புரட்சி வேடதாரிகள்’ வெளியிட்டுப் பம்மாத்துக் காட்டும் ஏமாற்றுகளில் இருந்து விடுபட்டு சமூக மாற்றத்துக்காக உண்மையில் உழைக்க முயலும் ஒவ்வொரு மார்க்சியரும் மாஓ சேதுங் சிந்தனையையும் திணை அரசியல் செல்நெறியையும் (இதன்பொருட்டு பழந்தமிழ்ப் பண்பாட்டு வரலாற்றையும்) கற்பது அவசியம்! அவற்றைத் தாங்கிய நூலக வாசல் திறந்தே உள்ளது, அனைவர்க்குமாக!